لانیکەم شەش هاووڵاتیی خەڵکی جوانڕۆ لەلایەن ناوەندە ئەمنییەکانی ئەو شارەوە دەستبەسەر کران.
ڕۆژی هەینی ١٩ی ڕەزبەری ٢٧١٩(١١ی ئۆکتۆبری ٢٠١٩)، هێزە ئینتزامی و ئەمنییەکانی شاری جوانڕۆ سەر بە پارێزگای کرماشان، لانیکەم ٦ هاووڵاتییان بە تۆمەتی هەوڵدان بۆ بەڕێوەبردنی خۆپیشاندان دژی لەشکرکەشی تورکیا بۆ رۆژاوای کوردستان دەستبەسەر کردووە.
ئەو شەش هاووڵاتییە لە کاتژمێر ١٢ی نیوەڕۆ دەستبەسەر و هەتا کاتژمێر شەشی ئێوارە لە دەستبەسەرگە ڕاگیراون
لە شاری جوانڕۆ ناسنامەی ئەو شەش هاووڵاتییە دەستبەسەر کراوە بەم شێوەیە ڕاگەیاند’ وەلی سەلیمی، نامدار سەلیمی، فاتێح محەمەد خانی، عادڵ وەیسی، دیاکۆ موسازادە و سەعید هیدایەتی.
رۆژی هەینی لە شارەکانی کوردستان، بڕیار بوو دوای بەرێوەچوونی نوێژی هەینی خۆپیشاندان بۆ پشتگیری لە ڕۆژئاوای کوردستان و شەرەمەزارکردنی کردنی لەشکرکەشی سپای تورکیە بۆ کوردستان بەرێوەبچێت.
لە شارەکانی سنە، بانە، دیواندەرە، مەریوان و پیرانشار خۆپیشاندان بەڕێوەچوو، لە شاری مەریوان تێکهەلچوون لە نێوان هێزە ئەمنییەکان و خەڵک رووی دا و بووە هۆی بریندار بوونی چەندین هاووڵاتی مەدەنی و هەروەها دوو کەس لە هێزەکانی ئیران. هەروەها چوار هاووڵاتی دەستبەسەر کراون کە تا ئێستا ناسنامەیان بۆ هەنگاو ڕوون نەبووەتەوە.