ئاکۆ جەلیلیان یەکێک لە نووسەر و لێکۆلەرە ناسراوەکانی خەڵکی ئیسلام ئابادی کرماشان (شائاباد)، دوای یەک حەفتە دەستبەسەر کران بە دانانی بارمتە ئازاد بوو.
بە پێی هەواڵی گەیشتوو ئەمڕۆ یەکشەمەم ١ی بەفرانباری ٢٧١٩ (٢٢ی دێسامبری ٢٠١٩)، ئاکۆ جەلیلیان، نووسەر و لێکۆڵەری بەناوبانگی کورد کە شەوی یەکشەممەی حەفتەی ڕابردوو دەستبەسەر کرابوو، بە دانانی بارمتە ئازاد کرا.
بنەماڵەی جەلیلیان لە ماوەی ٨ ڕۆژی ڕابردوودا لە چارەنووسی ناوبراو بێ ئاگا بوون.
ئیتلاعاتی سپای نەبی ئەکرەمی کرماشان لە کاتی دەستبەسەر کرانی ئاکۆ جەلیلیان ماڵی ناوبراویان پشکنیوە و کەل و پەلە تایبەتییەکانیان وەکوو بۆمابیل و لەبتۆب و… لەگەڵ خۆیان بردووە.
ئاکۆ جەلیلیان لەدایکبووی ساڵی ١٩٧٢ی زایینی شار ئیسلام‌ئاوای (شائاباد)ی سەر بە کرماشانە و یەکێکە لە نووسەرە پێشەنگەکانی بووژناەوەی زمان و ئەدەبی کوردییە لە پارێزگاکانی ئیلام و کرماشانە و زۆربەی کارەکانی توێژینەوەی مەیدانین لە بواری زمان و فەرهەنگی کوردیدا لە بەرهەمەکانی دەکرێ ئاماژە بکەین بە:
فه‌رهه‌نگ باشوور: وشه‌نامه‌ی کوردی خوارین.
زەڕینه و سیمینه /بەرگی یەکیم / پەند و ئیدیۆمی کوردی.
زه‌ڕینه و سیمینه /بەرگی دووەم/ مەتەڵی کوردی.
زه‌ڕینه و سیمینه /بەرگی سێیه‌م/ هه‌ڵبەستی فۆلکلۆر.
زه‌ڕینه و سیمینه /بەرگی چوارم/ بیر و باوه‌ڕه و ئەفسانە کوردیەکان.
زه‌ڕینه و سیمینه /بەرگی پێنجەم/ هه‌ڵبەستی شین و شەپۆڕ و ئازیه‌تی کوردی
ڕه‌نگامه / کورتە چیرۆکی کوردی
ئاگر مه‌لووچ / ڕومان کوردی (یەکەمین ڕۆمانی بە زاراوەی کەلهوڕی)
گه‌نجینه‌ی شێوه‌زاره ئێرانییەکان، شێوه‌زارناسی پارێزگای کرماشان /بەرگی یەکەم/
تاریکخانه: ناسنامەیەکی نوێ بۆ مێژوویەکی کۆن / بەرهەمێک سەبارەت بە ناوی کوردی ئاواییەکانی کرماشان.
فەرهەنگ کوردیکا: گەورەترین وشەنامەی کوردی (دایرەالمعارف). وشەنامەیەک له هەموو زاراوەکانی له باکوور و باشوور و ڕووژهەڵات و هاوکات زمانەکانی ئینگلیزی و فارسیشی تێدا گونجێندراوە.
بڕیارە کە چەند کەسی دیکە لە دەستبەسەر کراوانی شاری ئیسلام ئاباد ئەمڕۆ و سبەی بە دانانی بارمتە ئازاد بکرێن.