سێ هاووڵاتیی خەڵکی دەڕەشار بە ناوەکانی محەممەدئەمین شەمسی، ئەمیر ئەمراسی و کامیار ئەمراسی، هەر کامەیان سزای سێ ساڵ و یەک مانگ بەندکردنی تەعزیریان بەسەردا سەپێنرا.
ڕۆژی دووشەممە، ١١ی جۆزەردانی ١٤٠٥ی هەتاوی “١ی ژووئەنی ٢٠٢٦ی زایینی” ماڵپەڕی ئەنجومەنی زیندانییە سیاسییەکانی ڕۆژهەڵاتی کوردستان “خۆڕاگری” ڕایگەیاند: محەممەدئەمین شەمسی، ئەمیر ئەمراسی و کامیار ئەمراسی، سێ هاووڵاتیی دەسبەسەرکراوی خەڵکی شارۆچکەی “دەڕەشار”ـی سەربە پارێزگای ئیلام، پاش تێپەڕاندنی قۆناغەکانی دادگاییکردن، لەلایەن دەزگای قەزایی کۆماری ئیسلامیی ئێرانەوە، هەرکامیان سزای سێ ساڵ و یەک مانگ بەندکردنیان بەسەردا سەپێندراوە و گوازراونەتەوە بۆ بەندیخانەی قزڵحەساری کەرەج.
ئەو هاووڵاتییانە ڕۆژی هەینی، ١٩ی بەفرانباری ١٤٠٤ی هەتاوی، لەلایەن هێزە سەرکوتکەرەکانی ڕێژیمی ئێرانەوە دەسبەسەر و بۆ گرتنگەیەکی ڕێژیم لە کەرەج گوازرابوونەوە و دوای زیاتر لە چوار مانگ ڕاگیران، سزایان بەسەردا سەپێندراو و ڕەوانەی بەندیخانەی قەزڵحەسار کران و لەماوەی دەسبەسەربوونیاندا لە هەموو مافە سەرەتاییەکانیان بێبەش کرابوون.
Be the first to comment