خۆڕاگری: سەباح وەلەدبەیگی، مامۆستای خانەنشینکراو و چالاکی ژینگەپارێزی، لەگەڵ نەوزاد وەلەدبەیگیی برای، لەلایەن هێزە سەرکوتکەرەکانی ڕێژیمەوە دەسبەسەر کران.
ڕۆژی دووشەممە، ٢٢ی پووشپەڕی ١٤٠٥ی هەتاوی، ١٣ی جولای ٢٠٢٦ی زایینی” ماڵپەڕی ئەنجومەنی زیندانییە سیاسییەکانی ڕۆژهەڵاتی کوردستان “خۆڕاگری” ڕایگەیاند: هێزە سەرکوتکەرەکانی ئیدارەی ئیتلاعاتی ڕێژیم بەبێ بوونی هیچ بەڵگەیەکی قەزایی و یاسایی، هەڵیانکوتاوەتە سەر ماڵی صباح وەلەدبەیگی، لە گوندی “نوریاو”ـی سەر بە شاری پاوە و دەسبەسەریان کردووە و ڕۆژێک پاش دەسبەسەرکردنی، لە پێوەندییەکی تەلەفۆنیی کورتدا بە بنەماڵەکەیان ڕاگەیاندووە کە بە مەبەستی لێپێچینەوە بۆ یەکێک لە گرتنگە سەرکوتکەرەکانی ڕێژیم لە کرماشان گوازراوەتەوە.
لە لایەکی دیکەوە و لە درێژەی هێرشی هێزە سەرکوتکەرەکانی ڕێژیمی ئیسلامیی ئێران، لەماوەی چەند ڕۆژی ڕابردوودا، نەوزاد وەلەدبەیگی، برای سەباح-یش، دەسبەسەر کراوە و بۆ شوێنێکی نادیار گوازراوەتەوە و هەروەها ئەم دوو برایە کە خەڵكی شاری پاوەن، ڕۆژی ١٠ مانگی پووشپەڕی ئەمساڵ دەسبەسەر کراون و تائێستا چارەنووسیان نادیارە.
Be the first to comment