لاوێکی خەڵکی بۆکان بۆ جێبەجێکردنی سزای بەندکردن ڕەوانەی بەندیخانە کرا

خۆڕاگری: دیار حاجی ڕەسووڵ‌پوور، هاووڵاتیی خەڵکی بۆکان، بۆ تێپەڕاندنی سزای شەش مانگ بەندکردنی تەعزیری، ڕەوانەی بەندیخانەی ناوەندیی ئەو شارە کرا.
بەپێی هەواڵی ماڵپەڕی ئەنجومەنی زیندانییە سیاسییەکانی ڕۆژهەڵاتی کوردستان “خۆڕاگری” ڕۆژی یەکشەممە، ۲٤ی خەزەڵوەری ۱٤۰٥ی هەتاوی “۱٥ی نۆڤەمبەری ۲۰۲٦ی زایینی” دیار حاجی ڕەسووڵ‌پوور، هاووڵاتیی خەڵکی شاری بۆکان، کە لە هاوینی ئەمساڵدا لەلایەن دادگای ئینقلابی ڕێژیمی ئێرانەوە لە بۆکان بە تۆمەتی پڕوپاگەندە بەدژی نیزامی ڕێژیم سەرەتا سزای ٨ مانگ بەندکردنی بەسەردا سەپێنرابوو، پاش ناڕەزایەتی دەربڕین و پێداچوونەوە بە بڕیارەکەدا، سزاکەی بۆ شەش مانگ بەندکردنی تەعزیری کەم کرایەوە، ڕەوانە بەندیخانەی بۆکان کرا.
ناوبراو بەرەبەیانی ڕۆژی هەینی، ١٤ی سەرماوەزی ئەمساڵ، لەلایەن هێزە سەرکوتکەرەکانی ڕێژیمەوە بەبێ بوونی هیچ بەڵگەیەک، بەشێویەکی دڕەندانە و به بەکارهێنانی کردەوەی توندوتیژی دەسبەسەر کرابوو و هەروەها پاش ٢٦ ڕۆژ مانەوە لە گرتنگەکانی ڕێژیم، لە ڕۆژی سێشەممە، ٩ی بەفرانباری ١٤٠٤، بە دانانی بارمتەی ٦٠٠ ملیۆن تمەنی بە شێوەیەکی کاتی ئازاد کرابوو، تا ئەمڕۆ کە بۆ جێبەجێکردنی سزاکەی بانگ کرا و ڕەوانەی بەندیخانە کرا.