پشتیوانیی بەرفراوانی حیزب و ڕێکخراوەکان لەگەڵ گەلی بەلووچ لە ساڵوەگەڕی “کۆمەڵکوژیی خاش”ـدا

خۆڕاگری: لە میانەی بانگەوازێکی نێودەوڵەتیدا بۆ پشتیوانی لە گەلی بەلوچ، ١١٥ حیزب و ڕێکخراوی سیاسی و مەدەنی لە سەرانسەری جیهان پاڵپشتیی خۆیان بۆ خەباتی ئەم گەلە ڕاگەیاند.

ئەم بانگەوازە کە لە ڕێکەوتی ٢٩ی ئۆکتۆبەری ٢٠٢٦ لەلایەن حەسەن ساڵحی، ئەندامی “کۆمیتەی جیهانیی خەبات دژی ئیعدام لە دەبیرخانەی ئاوریل” ڕاگەیەنرابوو، ڕۆژی ١٤ی نۆڤێمبەری وەک ڕۆژی جیهانیی هاوپشتیی لەگەڵ گەلی بەلوچ دیاری کرد. ئەم ڕێکەوتە هاوکاتە لەگەڵ ساڵوەگەڕی کوشتاری بەکۆمەڵی خەڵکی شاری خاش کە لە چوارچێوەی سیاسەتی “کوشتارەکانی حاکمییەت”دا ئەنجام درا؛ ئەو دەمەی کە بزووتنەوەی “ژن، ژیان، ئازادی” لە لوتکەی هێزیدا بوو و هەواڵی لاقەکردنی کچێکی ١٦ ساڵەی بەلوچ بە ناوی “ماهور” شەپۆلێکی تووڕەیی لە جیهاندا دروست کردبوو.

بەپێی زانیارییەکان، لە ماوەی یەک هەفتەدا، بانگەوازەکە پێشوازییەکی بەرفراوانی لێ کرا و ژمارەی واژۆکاران بۆ ئاستی ١١٥ حیزب و ڕێکخراو بەرز بووەوە. لەو نێوانەدا، یەکیەتیی ژنانی دێموکراتی کوردستانی ئێران و ئەنجومەنی زیندانییانی سیاسیی ڕۆژهەڵاتی کوردستان لەو ڕێکخراوانە بوون کە بە فەرمی پشتگیرییان لەم بزووتنەوەیە کرد.

لە شاری ستۆکهۆڵمی وڵاتی سوید، چالاکییەکان بۆ پشتیوانی لە گەلی بەلووچ بە شێوەیەکی بەرچاو بەڕێوە چوون و حەسەن حاتەمی، وەک نوێنەری ئەنجومەنی زیندانییە سیاسییەکانی ڕۆژهەڵاتی کوردستان، لە کۆنفڕانس و کۆبوونەوە مەیدانییەکاندا بەشداریی کارای هەبوو.
ڕۆژی سێشەممە، ۱۹ی خەزەڵوەری ۱٤۰٥ی هەتاوی “١٠ی نۆڤەمبەری ۲۰۲٦ی زایینی” لە مەیدانی “سێرگێلس تۆری”ـی شاری ستۆکهۆڵم لە وڵاتی سوید چالاکوانان وێڕای پشتیوانی لە گەلی بەلووچستان، هاوکات پشتیوانیی خۆیان بۆ مانگرتنی زیندانییانی سیاسی لە ٦٦ بەندیخانەی ئێران دەربڕی کە لە ١٤٦مین هەفتەی بەردەوامی خۆیدا بوو و لەم گردبوونەوەیەدا ژمارەیەک لە تێکۆشەرانی حیزبی دێموکراتی کوردستانی ئێرانیش لە سوید بەشدار بوون.
بەڕێز حەسەن حاتەمی لەو گردبوونەوەیەدا وتارێکی پێشکەش کرد لە وتارەکەیدا جەختی لەسەر ئەوە کردەوە کە گەلانی کورد و بەلووچ لەنێو جوغرافیای ئێراندا، وەک دوو هێمای خەبات و بەرخۆدان دەناسرێن و خەباتی مەدەنی و سیاسیی ئەم دوو گەلە، بەتایبەت لە ڕەوتی شۆڕشی “ژن، ژیان، ئازادی”ـدا، زیاتر لە هەر کاتێکی تر یەکگرتوو و هاوئاهەنگ بووە و ئەم هاوپشتییە ڕۆژ بە ڕۆژ ڕەنگدانەوەی زیاتری دەبێت.
ئەم جموجووڵە جیهانییە پەیامێکی ڕوونی بۆ دەسەڵاتی ڕێژیمی ئێران هەبوو کە خەباتی گەلان بۆ بەدەستهێنانی مافە سەرەتاییەکانیان، چیتر لە چوارچێوەی جوغرافیایەک نامێنێتەوە و گۆڕاوە بۆ هاوپشتییەکی نێودەوڵەتی.