خۆڕاگری: چوار هاووڵاتیی خەڵکی شاری مەهاباد بە ناوەکانی “سابیر عینایەتی، کەماڵ پیرانپوور، مستەفا ئیبراهیمی و سەردار ئوستادئەحمەدی”، لەلایەن هێزە سەرکوتکەرەکانی ڕێژیمەوە دەسبەسەر کراون.
بەپێی هەواڵی ماڵپەڕی ئەنجومەنی زیندانییە سیاسییەکانی ڕۆژهەڵاتی کوردستان “خۆڕاگری”، لە درێژەی شەپۆلی دەسبەسەرکردنی هاووڵاتییان لە شاری مەهاباد، ڕۆژانی دووشەممە و سێشەممە ١٥ و ١٦ی پووشپەڕی ١٤٠٥ی هەتاوی (٦ و ٧ی جولای ٢٠٢٦ی زایینی)، هێزە داگیرکەرەکانی ڕێژیمی ئێران بەبێ بوونی هیچ بەڵگەیەکی قەزایی و یاسایی، سابیر عینایەتی، کەمال پیرانپوور، مستەفا ئیبراهیمی و سەردار ئوستادئەحمەدی، چوار هاووڵاتیی خەڵکی شاری مەهابادیان دەسبەسەر کردووە و گواستوویاننەتەوە بۆ شوێنێکی نادیار و چارەنووسیان ناڕوونە.
ئەو چوار هاووڵاتییە لە پاش دەسبەسەرکردنیانەوە تائێستا هیچ زانیارییەکی ڕاست و دروست لەسەر هۆکاری دەسبەسەرکردن، شوێنی ڕاگیران و چارەنووسیان لەبەردەستدا نییە و هەوڵ و بەدوداچوونی بنەماڵەکانیانیشیان بێئاکام ماوەتەوە و هەروەها بێبەشکردنیان لە مافی دەستپێڕاگەیشتن بە پارێزەر و چاوپێکەوتنی بنەماڵە، نیگەرانییەکی قووڵی لای ڕێکخراوەکانی مافی مرۆڤ دروست کردووە و داوای ئاشکراکردنی دەستبەجێی چارەنووسیان دەکرێت.
Be the first to comment